हुम्लाको हिल्दुम साना जलविद्युत् आयोजनाको मेसिन बिग्रँदा १८ सय घरधुरी ११ दिनदेखि अन्धकारमा बस्दै आएका छन् ।
विद्युतगृहमा रहेका दुई वटा मेशिनमध्ये एउटा मेशिनले काम गर्न छोडेपछि सिमकोट र खार्पुनाथ गाउँपालिकाका उपभोक्ता अन्धकारमा बस्न बाध्य भएका हुन् ।
दुवै मेशिनका पार्टपुर्जा पूरा नहुँदा हिउँदको समयमा सदरमुकामवासीले विगतका वर्षजस्तै लोडसेडिङको सामना गर्नुपर्ने अवस्था आएको हो ।
१५ वर्षदेखि पुरानै सामग्रीबाट काम चलाईँदै आएको हिल्दुम साना जलविद्युत् आयोजनामा वितरण केन्द्रको चरम लापरवाहीका दुःख पाएको सेवाग्राहीको गुनासो छ ।
आयोजनाले केही वर्ष अघिदेखि फुटेका पाइपलाई ठाउँठाउँमा टालटुल गरेर काम चलाउँदै आइएको थियो ।
ठेक्का प्रणालीबाट निर्माण गरिएको हिल्दुम साना जलविद्युत् आयोजनाको चिनियाँ कम्पनीसँग २०५८ पुसमा ठेक्का सम्झौता भएको थियो भने २०६५ साल जेठ १४ गतेबाट आयोजना सञ्चालनमा आएको थियो ।
दश दिन विद्युत् आपूर्ति नहुँदा जिल्लामा सञ्चालित सरकारी तथा गैरसरकारी कार्यालयलगायत उद्योग, पसल व्यवसायीले भने निकै समस्या भोग्नुपरेको छ ।
पछिल्लो पटक भदौ २० गतेदेखि विद्युत् आपूर्ति अवरुद्ध हुँदा सदरमुकामसहित सिमकोट र खार्पनाथ गाउँपालिकाका स्थानीय अन्धकारमा बस्न बाध्य भएका छन् ।
प्रतिक्रिया