कोरोना सङ्क्रमणले समस्या बढाएकै बेला बागलुङ बजारस्थित मुक्तिनाथ हस्पिटल तथा रिसर्च सेन्टर भने बन्द भएको छ । अस्पतालले ढोकामै सूचना टाँस गरेर केही दिनका लागि अस्पताल बन्द गरिएको जानकारी गराएको छ । कोरोना भाइरस परीक्षणलगायत सामग्री नभएकाले अस्पताल बन्द गरिएको सूचनामा उल्लेख छ । 

“हामीले चार दिनअघिदेखि सामग्री मगाएका थियौँ, प्राप्त भएको छैन”, अस्पतालका अध्यक्ष सन्तोष रावलले भने, “सामग्री आएमा तत्काल खुलाउन पनि सक्छौंँ ।” सरकारी अस्पतालमा सामग्री र बीमाको कार्यक्रम हुने तर निजीमा नहुने भएकाले चिकित्सक तथा कर्मचारीले पनि काम गर्न नमानेको उनले बताए ।
      
स्वास्थ्य कार्यालय बागलुङका प्रमुख सुरज गुरौले यस्तो अवस्थामा अस्पताल बन्द गर्नु राम्रो नभएको बताए । उनले निजी अस्पतालको दर्ता र कारवाहीको प्रक्रिया स्थानीय तहमा गएकाले खोल्न सुझाव मात्र दिइएको बताए । “यस्तो बेलामा आकस्मिक सेवा मात्रै दिएको भए पनि राम्रो हुन्थ्यो”, उनले भने ।
  
बागलुङ नगरपालिकाका प्रमुख जनकराज पौडेलले वर्तमान अवस्थामा कुनै जानकारीविना ढोकामा सूचना टाँसेर अस्पताल बन्द गर्नु अत्यन्तै गैरजिम्मेवारीपूर्ण काम भएको बताए । उनीहरुले किन अस्पताल बन्द गरेका हुन् स्पष्टीकरण सोधेर तत्काल कारवाही प्रक्रिया अगाडि बढाइने चेतावनी उनले दिए । 
 
अस्पतालमा आउने सबै प्रकारका बिरामीको उपचार दिनुपर्ने बेला बन्द गर्ने काम मानवीयताविरुद्धको भएको भन्दै जिल्लाभर नै विरोध भएको छ । सर्वसाधारणले समेत अस्पताल बन्द गरेकामा विरोध जनाएका छन् ।