काठमाडौं, चालु आर्थिक वर्षको नौ महिनामा अर्थात चैत मसान्तसम्ममा धितोपत्र बजारमा ३ खर्ब १८ अर्ब रुपैयाँ बराबरको धितोपत्र सूचीकृत भएका छन्  । नेपाल धितोपत्र बोर्डले कुल सूचीकृत मध्ये २९ अर्ब २१ करोड बराबरको धितोपत्र निष्काशन गर्न अनुमति दिएको छ । नेपाल राष्ट्र बैंकले बुधबार सार्वजनिक गरेको विवरणले यस्तो देखाएको हो ।

विवरण अनुसार चालु आर्थिक वर्षको ९ महिनासम्ममा २ खर्ब १९ अर्ब ९५ करोड रुपैयाँ बराबरको विकास ऋणपत्र, ३९ अर्ब ४७ करोड रुपैयाँ बराबरको साधारण शेयर, ३८ अर्ब ११ करोड बराबरको बोनस शेयर, १४ अर्ब ५५ करोड बराबरको डिबेन्चर, ३ अर्ब ९२ करोड बराबरको हकप्रद शेयर र २ अर्ब ८५ करोड बराबरको म्युचुअल फण्ड गरी कुल ३ खर्ब १८ अर्ब ८५ करोड रुपैयाँ बराबरको थप धितोपत्र सूचीकृत भएका हुन् ।

समीक्षा अवधिमा नेपाल धितोपत्र बोर्डले ११ अर्ब ५९ करोड बराबरको साधारण शेयर, ११ अर्ब ८४ करोड बराबरको डिबेन्चर, ३ अर्ब ३० करोड बराबरको म्युचुअल फण्ड र २ अर्ब ४८ करोड बराबरको हकप्रद शेयर गरी कुल २९ अर्ब २१ करोड बराबरको धितोपत्र निष्काशन गर्न अनुमति दिएको छ ।