एजेन्सी : युरोप र अमेरिकाबाट बेलायत प्रवेश गर्ने कोरोनाविरुद्ध दुवै मात्रा खोप लगाइसकेका यात्रुले क्वारेन्टिन बस्नु नपर्ने भएको छ । बेलायते कोरोना संक्रमण नियन्त्रणका लागि लगाइएको प्रतिबन्ध हटाउदै यस्तो नियम लागु गरेको हो । 

उक्त नियम आगामी सोमबारवाट लागू हुने छ । नयाँ नियमसँगै लामो समयदेखि आफ्ना परिवारबाट टाढिएका व्यक्तिहरुसँग भेट्न पाउने अवसर मिल्ने बेलायत सरकारले जनाएको छ ।

यात्रा गर्नु अघि र बेलायत पुगेपछि यात्रुहरुले अनिवार्य पीसीआर परीक्षण भने गर्नुपर्ने नियम लागू गरिएको छ । युरोपेली यात्रुका लागि ‘इयू डिजिटल कोभिड प्रमाणपत्र’ र अमेरिकाबाट आउनेहरुले सीडीसी कार्ड अनिवार्य गरिएको छ ।

दुवै डोज खोप लगाएको प्रमाणस्वरूप कार्ड अनिवार्य गरिएको हो । कोरोना संक्रमण दर बढेपनि जनजीवन सामान्य हुँदै गएको भन्दै प्रतिबन्ध हटाएको बेलायतले जनाएको छ ।