काठमाडौं - नेपाल स्टक एकस्चेन्ज (नेप्से)को अनलाइन शेयर कारोबार गर्ने सफ्टवेयर मर्मतको जिम्मा पाएको कम्पनी वाइकोले उक्त जिम्मेवारी अर्को कम्पनीमा सार्न खोजेपछि नेप्सेले अस्वीकार गरेको छ । 

वाइकोले वार्षिक नबीकरणको समय पारेर उक्त जिम्मेवारी अर्को कम्पनीमा सार्न खोजेपछि नेप्सेले उक्त प्रस्ताव अस्वीकार गरेको हो ।नेप्सेको अनलाइन सफ्टवेयर निर्माता कम्पनी वाइको हो । उसैले नेप्सेको अनलाइन सफ्टवेयर निर्माण देखि मर्मतसम्मको काम गर्दै आएको छ । 

मर्मतकोलागि कम्पनीले नेप्सेसँग बार्षिक शुल्क लिने गरेको छ । हेरेक वर्ष उक्त मर्मतको जिम्मेवारी निर्माता कम्पनीले नै पाउने गरेको छ । 

हरेक बर्षको कात्तिकमा नेप्से र वाइकोबीच सम्झौता नवीकरण हुँदै आएको छ । चालु बर्षको जिम्मेवारीको नबीकरण यही कात्तिकमा हुने थियो । सोही समयमा उसले उक्त जिम्मेवारी वाइको सलुसन नामक कम्पनीलाई दिन भन्दै नेप्सेलाई प्रस्ताव गरेको थियो । 

तर नेप्सेले भने उक्त जिम्मेवारी निर्माता कम्पनी बाहेकलाई दिन नसकिसने भन्दै वाइकोले गरेको प्रस्ताव अस्वीकार गरिदिएको जनाएको छ। नेप्सेको टिएमएस लगायतको काम गर्ने उदेश्यले वाइको सोलुसन नामक कम्पनी दर्ता गराएको थियो । 

उक्त कम्पनीमा सूचिकृत कम्पनीकै लगानी रहेको र भविष्यमा डाटाको गोपनीयतामा समस्या आउने भन्दै नेप्सले उक्त प्रस्ताव अस्वीकार गरेको हो ।