उता रामेछापमा कालो धन थुपारेर जलविद्युत्मा लगानी गर्दै आएका इपानका पूर्व अध्यक्ष समेत डा सुर्वण दास श्रेष्ठले जलविद्युत्को नाममा ढुंगा गिटीको कारोवार गर्न थालेपछि स्थानीयले पाता कस्ने तयारी गरेका छन् । गैरआवासियको लगानी भन्दै उनले विभिन्न जिल्लामा आयोजना बनाइरहेका छन् । तर त्यसको स्रोत के हो भन्ने बारेमा उनले कुनै जानकारी दिने गरेका छैनन् । श्वेतगंगा हाइड्रो पावरको नाममा जलविद्युत् आयोजना बनाउन लागेका श्रेष्ठले आयोजनाको नाममा रातभरी ढुंगा गिटीको कारोवार गर्ने गरेका छन् । 

लिखु तामाकोशी गाँउपालिकामा २८ मेगावाट क्षमताको आयोजना बनाइरहेका श्रेष्ठले स्थानीय सरकारसँग ढुंगा गिटीको प्रयोग सम्बन्धी स्वीकृति समेत लिएका छैनन् । उनले पुलिस लगाएर स्थानीयलाई ठिक गर्ने धम्की दिँदै हिडेडका छन् । जसका कारण स्थानीयबासी आक्रोशित भएका छन् । उनीहरुले स्वीकृति नलिए आयोजनाको काम अगाडि बढ्न नदिने चेतावनी दिएका छन् । आयोजनाले गाउँपालिकाको स्वीकृति नलिइ क्रसर सञ्चालन गरिरहेको र उक्त क्रसरलाई गाउँपालिकाका दायराभित्र ल्याउन पत्राचार गर्दा आयोजनाले उल्टै दादागिरी देखाएको स्थानीयको भनाइ छ । 

राज्यबाट स्वीकृति दिएका छौं भन्दै आयोजनाका सञ्चालकहरुले हाम्रो पत्रको जवाफ पनि दिएनन,’ गाँउपालिका अध्यक्ष गोविन्द खड्काले भने ‘स्थानीय तह पनि राज्य हो । स्थानीय स्रोत र साधनको उपयोग र सञ्चालमा हाम्रो पनि अधिकार छ ।’ जलविद्युत क्षेत्रका माफियाहरु आफ्नो राजनीतिक करियर सिध्याउन लागेको भन्दै सबैलाई सचेत रहन उनले आग्रह समेत गरेका छन् । गाँउपालिकाको स्वीकृति नलिएको र बालुवाको कारोवार गरेको भन्दै स्थानीयले सो आयोजनाका लगानीकर्तालाई ठेगान लगाइदिने बताउँदै आएका छन् ।