काठमाडौं – ललितपुरको पुल्चोकस्थित सुमेरु सेभिङ एण्ड क्रेडिट सहकारीका तत्कालीन अध्यक्ष भरत महर्जन बेपत्ता छन । सहकारीको रकम हिनामिना प्रकरणमा प्रहरीको केन्द्रीय अनुसन्धान ब्यूरो (सीआईबी) ले  महर्जनविरुद्ध रेड नोटिस जारी भएको ४ महिना भइसकेको छ ।

समाचार स्रोतका अनुसार सुमेरु सहकारीमा ३६ हजार बढी बचतकर्ताले राखेको १० अर्ब भन्दाबढी रकम महर्जनले हिनामिना गरेका छन् । उक्त कुरा सीआईबीको अनुसन्धानले देखाएको छ। करिब एक वर्षअघिदेखि नै बचतकर्ताले रकम फिर्ता नपाएपछि सहकारी विभागमा उजुरी परेको थियो। महर्जनविरुद्ध १९ माघ, २०८० मा रेड नोटिस जारी भए पनि अहिलेसम्म पक्राउ भने परेका छैनन् । महर्जन बेलायतमा लुकेर बसेको आशङ्का गरिएको छ । तर, रेड नोटिस जारी भएको ४ महिनासम्म पनि उनको अत्तोपत्तो छैन । बचतकर्ताले आफ्नो रकम खोज्न थालेपछि उनी उपचारको बहाना बनाएर परिवारसहित बेलायत उडेको स्रोत बताउँछ । 

 उक्त सहकारीका संस्थापक अध्यक्ष महर्जनविरुद्ध सुमेरुको वर्तमान अध्यक्ष काशीराज दाहाल, सदस्य विनोद आचार्य र अर्का सदस्य धनेन्द्र कट्टेलले २०८० पुसमा जाहेरी दिएका हुन् । कट्टेल सुमेरु सेभिङ्ग एण्ड क्रेडिटको पूर्व व्यवस्थापक समेत हुन् । उनीहरुले महर्जनले निक्षेप लिएर भागेको आरोप लगाएका छन् ।

प्रहरीको अनुसन्धानले बचतकर्ताको रकम महर्जनले आफ्नो र आफन्तको नाममा खडा गरेको कम्पनीहरूमा मनोमानी रूपमा बिना निर्णय ऋण बनाएर तथा सोझै रकमान्तर गरेर अपचलन गरेको  निष्कर्ष निकालेको छ । सुमेरुमा ३६ हजार ३०५ जना निक्षेपकर्ता छन् । सहकारी सञ्चालक भरत र उनको परिवार बेलायत पलायन भएपछि बचतकर्ताहरूले ६ वैशाख २०८० मा भेला गरेर समिति बनाएका छन् । समितिले सञ्चालक समितिसँग मिलेर सुमेरु सरकारीको श्वेतपत्र जारी गर्नुका साथै बचत फिर्ताको कार्ययोजना समेत बनाएको छ ।

सहकारीले विभिन्न संस्थाहमा लगानी गरेको देखिएको छ । श्वेतपत्र अनुसार अहिलेसम्म देखिएका कम्पनी तथा जग्गाको बजार मूल्य ११ अर्ब ४९ करोड देखिएको छ भने ४ अर्ब १० करोड ऋण प्रवाह भएको पाइएको छ । बचतकर्ताको १० अर्ब ३४ करोड निक्षेप तथा दायित्व छ भने बैंकको कर्जा र अरू दायित्व १ अर्ब २४ करोड छ । सुमेरु सिटी हस्पिटलमा कुमारी बैंकको २५ करोड ऋण लगानी रहेको सहकारीका अध्यक्ष हेमराज दाहाल बताउँछन् ।

बचतकर्ताको रकम सुमेरु अस्पतालमा कुमारी बैंककै ८० करोड र प्रभु बैंकको २० करोड ऋण लगानी छ । यदि यो मिलान गर्न सक्ने हो भने सुमेरु सहकारीको बचतकर्ताको रकम फिर्ता हुने देखिएको बचतकर्ता समितिका अध्यक्ष ठाकुरचन्द्र श्रेष्ठ बताउँछन् ।  महर्जनले सहकारीको रकम अपचलन गर्ने उद्देश्यले परिवारका सदस्यहरुको नाममा राखेकोले उक्त रकम सहकारीमा ल्याउन चुनौतिपूर्ण रहेको अध्यक्ष श्रेष्ठले बताएका छन् । महर्जनले सुमेरु ग्रुपको नाममा १७ वटा कम्पनीहरू खडा गरेर गलत तवरले ऋण प्रवाह गरेको भेटिएको छ ।सुमेरु सहकारीको निक्षेप निजी अस्पताल, कलेज, मेडिकल कलेज, रिसोर्ट र मार्टमा लगानी गरेको भेटिएको हो