काठमाडौं - काभ्रेको खानीखोला गाउँपालिका वडा नं. १ धार्नेमा नेवा खानेपानी संस्थाको सहयोगमा ६५ घरधुरीका लागि 'जगाते (धार्ने) खवासे खानेपानी तथा सरसफाइ योजना'को उद्घाटन सम्पन्न भएको छ। यस योजनाको उद्घाटन खानीखोला गाउँपालिकाका अध्यक्ष इन्द्र बहादुर थिङ (छिन्ताङ) को प्रमुख अतिथ्यतामा गरिएको हो।

खानीखोला गाउँपालिका र नेवा खानेपानी संस्थाको साझेदारीमा सञ्चालन भइरहेको यस योजनाले स्थानीय बस्तीको पानीको समस्या समाधान गर्ने उद्देश्य राखेको छ। योजना अनुसार, प्रत्येक घरधुरीलाई एक घर एक धारा सुविधा उपलब्ध गराइएको छ, जसले पूर्ण स्वच्छ खानेपानीको सुनिश्चितता गर्नेछ। 

गाउँपालिकाका अध्यक्ष थिङले यो योजना गाउँको पानी आपूर्ति प्रणालीमा ठूलो परिवर्तन ल्याउने विश्वास व्यक्त गर्दै भने, “खानेपानीको मुहान र बस्तीको अवस्थाअनुसार पानी पुर्‍याइनेछ, जसबाट स्थानीय जनतालाई पानीको अभाव हुने छैन। यो योजना निरन्तरता प्राप्त गर्दै पूर्ण दिगोपनसँगै कार्यान्वयन हुनेछ।”

फलामेटारमा कृषि सामाग्री वितरण कार्यक्रम सम्पन्न

त्यसैगरी, खानीखोला गाउँपालिका वडा नं. २ फलामेटारमा कृषि सामाग्री वितरण कार्यक्रम सम्पन्न भएको छ। यो कार्यक्रम जिल्ला कृषि विकास कार्यलय, खानीखोला गाउँपालिका र स्थानीय समुदायको साझेदारीमा आयोजना गरिएको हो। "एक वडा एक कफि उत्पादन" कार्यक्रमअन्तर्गत काभ्रे जिल्ला कृषि विकास कार्यलय र खानीखोला गाउँपालिकाले ६०५ कृषि सामाग्री वितरण गरेका छन्।

कार्यक्रममा ३ वटा कफि मिसिन, १५ वटा मिनि टेलर, ४० वटा इस्प्रे पम, गोडेन पाइप, हजार केजी कृषि चुन र ८ मेट्रीक टन अनुदान स्वरुप प्रदान गरिएको थियो। यस अवसरमा गाउँपालिकाका प्रमुख इन्द्र बहादुर थिङ (छिन्ताङ) र जिल्ला कृषि विकास कार्यलय काभ्रेका प्रमुख कुल प्रसाद दवाडीको उपस्थिति रहेको थियो।

कार्यक्रममा वडा अध्यक्षहरु, जनप्रतिनिधिहरु, स्थानीय बुद्धिजीवी, युवा, व्यवसायी र कृषकहरुको उपस्थिति थियो। यस कार्यक्रमले स्थानीय कृषकहरुलाई थप सशक्त बनाउने र कृषि क्षेत्रमा समृद्धि ल्याउने विश्वास व्यक्त गरिएको छ।