काठमाडौं- समाजवादीले मोर्चाकोे प्रदर्शनलाई एमाले महासचिव शंकर पोखरेलले प्रतिगमनको ‘कू’ प्रयास विरुद्धको सकारात्मक पहल भएको बताएका छन् । चैत १५ गते(शुक्रबार) गणतन्त्रको पक्षमा मोर्चाले गर्न लागेको सडक प्रदर्शनलाई लक्षित गर्दै एमाले महासचिव पोखरेलले  लोकतान्त्रिक व्यवस्थामाथि कसैले धावा वोल्दछ भने त्यसको डटेर सामना गर्ने पनि उल्लेख गरेका छन् ।

‘प्रतिपक्षमा रहेको समाजवादी मोर्चाले १५ गतेका दिन गणतन्त्रका पक्षमा गर्न लागिरहेको जनप्रदर्शन प्रतिगमनको कूप्रयासका विरुद्धको सकारात्मक पहल हो ।’,उनले सामाजिक सञ्जालमा लेखेका छन्,‘राजनीतिक दलहरु आपसमा प्रतिस्पर्धा गर्दछन्। एक अर्काको आलोचना र विरोध पनि गर्दछन् । जनअभिमतवाट आफुलाई स्थापित गर्ने कोशिस समेत गर्दछन् ।  तर जनताको सार्वभौमसत्ता र लोकतान्त्रिक व्यवस्थामाथि कसैले धावा वोल्दछ भने त्यसको डटेर सामना पनि गर्न सक्दछन् । इतिहासले धेरै पटक प्रमाणित गरेको छ । त्यसमाथि अहिलेको युग जनसचेतनताले सुसम्पन्न लोकतन्त्रको युग हो ।’

शुक्रबार राजावादीहरुले राजधानी केन्द्रित जनप्रदर्शन गर्न लागेका छन् भने गणतन्त्रको रक्षार्थ भन्दै चार दल सम्मिलित समाजवादी मोर्चाले पनि सोही दिन प्रदर्शनको तयारी गरेको छ ।  मोर्चामा माओवादी केन्द्र, एकीकृत समाजवादी, नेपाल समाजवादी पार्टी(नेसपा) र विप्लव नेतृत्वको नेकपा रहेका छन् ।