काठमाडौं- नेपाल राष्ट्र बैंकले वित्तीय कारोबारमा तीन तहको सुरक्षा आवश्यक रहेको बताएको छ ।

आधुनिक डिजिटल प्रविधिले वित्तीय सेवालाई सहज बनाएपनि प्रविधिको दुरुपयोग हुँदा जोखिम बढेकोले सुरक्षा आवश्यक रहेको बैंकले जानकारी दिएको छ । बैंकले प्रविधिको दुरुपयोगबाट बच्नका लागि तीन तहको उच्च सुरक्षा आवश्यक रहेको बताएको हो। 

तीन तहका सुरक्षा तहहरु निम्न छन्ः–
तपाईलाई मात्र थाहा हुनेः यो तहले व्यक्ति आफूलाई मात्र थाहा हुने जानकारीलाई जनाउँछ । यसमा पासवर्ड, पिन नम्बर वा गोप्य प्रश्नको उत्तर समावेश हुन्छ । यस तहको सुरक्षा मुख्य रूपमा मानिसको ज्ञान र सम्झनामा भर पर्छ ।

तपाईसँग मात्र हुनेः यो तहमा त्यस्ता वस्तु पर्दछन्, जसको पहुँच  व्यक्ति आफूसँग मात्र हुन्छ । जस्तैः मोबाइल फोन, बैंक कार्ड वा सुरक्षा टोकन । यी वस्तुले व्यक्तिको पहिचान प्रमाणित गर्न मद्दत गर्दछन् र  वित्तीय कारोबारलाई सुरक्षा प्रदान गर्दछन् ।

तपाईको आफ्नैः यसमा व्यक्तिको व्यक्तिगत बायोमेट्रिक विवरणहरू जस्तै औंठाछाप, अनुहार वा आँखाको स्क्यानिङ आदि पर्दछन् ।

बैंकले वित्तिय कारोबारका लागि प्रमाणीकरण विधिको प्रयोग गर्न र व्यक्तिगत विवरणहरु गोप्य राख्न आग्रह गरेको छ ।