काठमाडौं - नेपाल सरकारको मन्त्रिपरिषद्ले नेपाल स्टक एक्सचेन्ज(नेप्से) को प्रमुख कार्यकारी अधिकृत (सीईओ) पदमा चूडामणि चापागाईँलाई नियुक्त गरेको छ।

सोमबार साँझको मन्त्रिपरिषद् बैठकले चापागाईँलाई सीईओमा नियुक्त गर्ने निर्णय गरेको हो। यसअघि चैत ११ गते सोमबार, मन्त्रिपरिषद्ले नेप्सेको प्रमुख कार्यकारी अधिकृतमा नारदकुमार लुईंटेललाई नियुक्त गर्ने निर्णय गरेको थियो, तर पछि फेरि एक हप्ता नपुग्दै चापागाईँलाई नियुक्त गरिएको हो।

मन्त्रिपरिषद् बैठकले उक्त निर्णयसँगै २८ वटा निर्णय गरेको थियो, जसमा २७ वटा निर्णय सार्वजनिक गरिएको थियो। तथापि, लुईंटेलको नियुक्ति सार्वजनिक नगरी अर्को निर्णय गरिएकाले चापागाईँलाई सीईओमा नियुक्ति दिने प्रक्रिया सम्पन्न भएको हो।

चापागाईँ पूर्वबैंकर हुन् र उनले सानिमा बैंकको इटहरी शाखामा ब्रान्च म्यानेजरको रूपमा ३ वर्ष कार्य गरेका थिए। त्यसपछि उनले युनियन लाइफ इन्स्योरेन्समा असिस्टेन्ट जनरल म्यानेजरको रूपमा काम गरेका थिए र सानिमा लाइफ इन्स्योरेन्समा डेपुटी जनरलको भूमिका पनि निभाएका थिए।

नेप्से सीईओका लागि गत फागुन १२ मा पहिलोपटक आवेदन माग्दा १२ जनाले आवेदन दिएका थिए। त्यसपछि चैत ३ मा अर्थ मन्त्रालयले सहसचिव सेवन्तक पोखरेलको संयोजकत्वमा नियुक्ति सिफारिस समिति गठन गरेको थियो, जसले ५ जनाको नाम सिफारिस गरेको थियो। उक्त सूचीमा चापागाईँ पहिलो नम्बरमा थिए।