काठमाडौं- सन् २०२५ सुरु भएयता क्रोएसियाले विदेशी कामदारहरूका रूपमा सबैभन्दा धेरै नेपाली भित्र्याएको छ । क्रोएसियामा सन् २०२५ यता क्रोएसियामा सबैभन्दा धेरै वर्किङ भिसा पाउनेमा नेपालीहरू पहिलो स्थानमा छन् । 

सन् २०२४ सम्ममा क्रोएसियामा बोस्नियाका कामदारहरूको दबदबा रहँदै आएको थियो । तर सन् २०२५ यता भने नेपालीहरूले सबैलाई उछिनेर सबैभन्दा धेरै वर्क पर्मिट र रेसिडेन्ट पर्मिट पाएका छन् । 

क्रोएसियाको गृह मन्त्रालयका अनुसार गत जनवरी र फेब्रुअरीमा ३४ हजार ४४० नयाँ वर्क पर्मिट जारी भएको छ । जसमध्ये सबैभन्दा धेरै ८ हजार २ सय पर्मिट नेपालीले पाएका हुन् । यो कुल जारी गरिएका पर्मिटको २४ प्रतिशत हो । 

नेपालीपछि बोस्नियाका करिब ६ हजार कामदारले वर्क पर्मिट पाएका छन् । त्यस्तै, फिलिपिन्सका ४ हजार ४ सय र भारतका ४ हजार कामदारलाई वर्क पर्मिट दिइएको छ । तथ्याङ्कले क्रोएसियामा नेपालीहरूको सङ्ख्या बढ्दै गएको देखाएको छ । 

सन् २०२४ मा पनि क्रोएसियाले २ लाख ६ हजार ५ सय विदेशी कामदार भित्र्याएको थियो । जसमध्ये ३५ हजार ६ सय नेपालीहरू थिए । नेपालीहरूको यो सङ्ख्या सो वर्ष क्रोएसियामा वर्क पर्मिट र रेसिडेन्ट पर्मिट पाउनेहरूको हो । 

क्रोएसियामा नेपालीहरू निर्माण, होटल तथा रेस्टुरेन्ट, उद्योग कलकारखाना लगायतका क्षेत्रमा कार्यरत छन् । सन् २०२३ मा मात्रै क्रोएसियामा रहेका नेपालीले १० अर्ब रुपैयाँ रेमिटेन्स पठाएका थिए ।