काठमाडौं - नेपाल पुनर्बीमा कम्पनी लिमिटेडले गत आर्थिक वर्षको चौथो त्रैमासिक वित्तीय विवरण सार्वजनिक गरेको छ । 

गत आर्थिक वर्षमा १ अर्ब १३ करोड रुपैयाँ खुद नाफा कमाएको छ, जुन अघिल्लो वर्षको तुलनामा २७.४१ प्रतिशतले घटेको हो। अघिल्लो वर्ष कम्पनीले १ अर्ब ५५ करोड रुपैयाँ खुद नाफा कमाएको थियो। नाफा घटेसँगै कम्पनीको प्रतिशेयर आम्दानी पनि घटेको छ। अघिल्लो आवमा १२ रुपैयाँ १७ पैसा रहेको प्रतिशेयर आम्दानी अब घटेर ८ रुपैयाँ ४३ पैसा कायम भएको छ।

कम्पनीको कुल आम्दानी पनि घटेको छ। गत आवमा १२ अर्ब ३० करोड रुपैयाँ रहेको कुल आम्दानी अब घटेर ११ अर्ब २८ करोड रुपैयाँ पुगेको छ। कम्पनीले ९ अर्ब ४९ करोड रुपैयाँ खुद बीमाशुल्क आर्जन गरेको छ भने अघिल्लो वर्षमा यो रकम ९ अर्ब ८८ करोड रुपैयाँ थियो।

यसको अलावा, कम्पनीको चुक्ता पुँजी १३ अर्ब ४२ करोड रुपैयाँ रहेको छ भने स्पेशल रिजर्भमा ४ अर्ब ४० करोड, महाविपत्ति कोषमा ३२ करोड र रिटेन्ड अर्निङमा ५२ करोड रुपैयाँ रहेका छन्। कम्पनीको बीमा कोषको आकार ७ अर्ब २४ करोड रुपैयाँबाट बढेर ९ अर्ब रुपैयाँमाथि पुगेको छ। कम्पनीको प्रतिशेयर नेटवर्थ १४५ रुपैयाँ रहेको छ।