काठमाडौँ - विश्वको महाशक्ति राष्ट्र अमेरिकामा राष्ट्रपति डोनाल्ड ट्रम्प निर्वाचित भएपछि विश्व अर्थव्यवस्थामा ठूलो हलचल आउने संकेतहरु देखिएका छन् । उनले हालै विश्वका विभिन्न मुलुकहरुको लागि भन्सार दर तोकेका छन् । यसले अमेरिकी अर्थतन्त्रलाई त एकहदसम्म बलियो बनाउला तर कालान्तरमा प्रत्यत्पादक नै हुने सरोकारवालाहरुले बताएका छन् । ट्रम्पको नीतिले विश्व व्यापार युद्धमा फस्ने त होइन भन्ने संशय पनि पैदा भएको छ । 

उनको नीतिले अमेरिकाले अवलम्बन गर्दै आएको परम्परालाई धक्का दिने भन्दै अमेरिकी नीति निर्माताहरुले नै टिप्पणी गर्न थालेका छन् । विकासोन्मुख र विकासशील देशहरुको लागि उनको भन्सार नीति तत्कालका लागि अप्रिय कदम ठानिएको छ । एसियाली देशहरूमाथि भारी मात्रामा अतिरिक्त भन्सार महसुल लगाएका छन् । ट्रम्पले चीनबाट आउने सामानमा ३४ प्रतिशत महसुल लगाएका छन् । त्यस्तै भियतनामबाट आउने सामानमा ४६ प्रतिशत र कम्बोडियाबाट आउने सामानमा ४९ प्रतिशत भन्सार लगाएका छन् । 

यसैगरी भारतबाट आउने सामानमा भने केही कम २६ प्रतिशत मात्रै अतिरिक्त भन्सार महसुल लगाएको छ । पहिला देखि नै आर्थिक वृद्धिदर सुस्ताइरहेको अवस्थामा अमेरिकी अतिरिक्त भन्सार महसुलले माग घटेर यी देशका आर्थिक वृद्धिदर थप सुस्ताउने विश्लेषण आइरहेको छ । ट्रम्पले भारतबाट आउने औषधीलाई भने अतिरिक्त भन्सार महसुलमा समेटेका छैनन् । 

अर्थतन्का बहुआयामिक क्षेत्रहरु ट्रम्पको अतिरिक्त भन्सार महसुलको कारणले प्रभावित भएका छन् । उक्त घोषणाले एसियाली शेयर बजार पनि त्रस्त भएको छ ।  यसैगरी जापानमा निक्केई २२५ परिसूचक ३ दशमलव शून्य १ प्रतिशतले घटेको छ । चीनमा साङहाई कम्पोजिट इन्डेक्स शून्य दशमलव ५१ प्रतिशतले घट्दा हङकङमा हाङसेङ पनि १ दशमलव ६१ प्रतिशतले घटेको थियो ।

अमेरिकी भन्सार नीतिको प्रभावबाट दक्षिणपूर्वी एसिया पनि अछुतो रहेको छैन । जसको कारण दक्षिण कोरिया, थाइल्यान्ड, सिंगापुर, लगायत यस क्षेत्रका अधिकांश शेयर बजार रातोमा आएका छन् । अतिरिक्त भन्सार महसुलको प्रभावले भारतमा बीएसई सेन्सेक्स १ दशमलव शून्य ५ प्रतिशतले घटेको छ । यसबाट अमेरिका विश्वमा आफ्नो आर्थिक साम्राज्य बिस्तार गर्न चाहन्छ भन्ने स्पष्ट भएको छ । तर ट्रम्पले के पनि बुझ्न जरुरी छ भने बाँकी विश्वले अमेरिकामाथि यसैगरी अतिक्ति कर लगायो भने त्यसको परिणाम के होला ?