काठमाडौं- वाणिज्य, आपूर्ति तथा उपभोक्ता संरक्षण विभागले काठमाडौं उपत्यकामा सवारीसाधनको व्यापारिक क्रियाकलापमा निगरानी बढाएको छ। 

उपभोक्ताको हकहितको संरक्षण गर्ने उद्देश्यले एक सातादेखि विभागले सवारीसाधनका शोरुम, मोटरसाइकल तथा स्कुटर बिक्री केन्द्र, स्पेयर पार्टस पसल र सर्भिस सेन्टरहरूमा निरन्तर रूपमा अनुगमन थालेको हो । साथै, अनियमितता भेटिएका व्यवसायिक इकाइहरूमाथि कारबाही प्रक्रिया अघि बढाएको विभागले जनाएको छ।

विभागले चार अटो पार्टस बिक्रेतालाई बिक्री वितरणमा रोक लगाएको छ। ती बिक्रेता कम्पनीहरुलाई चैत २१ गते पत्राचार गर्दै कागजातसहित उपस्थित हुन निर्देशन पनि दिईसकेको छ । 

बिक्री रोक्का गरिएका कम्पनीहरूमध्ये काठमाडौं–१४ को अटो एक्सपोर्ट र काठमाडौं–१३ को भाव्या ट्रेडर्सलाई तत्काल बिक्री वितरण नगर्न सूचित गरिएको छ भने काठमाडौं–१४ को कार क्वीन र काठमाडौं–१४ को बज्र अटो पार्टसलाई तीन दिनभित्र आवश्यक कागजातसहित विभागमा उपस्थित हुन भनिएको छ।

विभागले सवारीसाधन क्षेत्रको अनियमितता नियन्त्रणका लागि अनुगमन गर्दै उपभोक्ता हितविपरीत क्रियाकलाप गर्ने व्यवसायिक संस्थामाथि कारबाही प्रक्रिया कडा बनाउने बताएको छ ।