काठमाडौं- मध्यपश्चिम विश्वविद्यालयको कार्यकारी परिषद् सदस्य नियुक्त गर्न गरिएको सिफारिस विवादमा परेको छ । 

विश्वविद्यालयका उपकुलपति प्रा.डा धुव्रकुमार गौतमले एकलौटी तरिकाले सिफारिस गरेको आरोप लागेसँगै विवाद सतहमा आएको हो । 

कार्यकारी परिषद्ले गत चैत २२ गते विश्वविद्यालयका कुलपति एवं प्रधानमन्त्री केपी शर्मा ओलीसमक्ष नारायणनाथ योगीलाई कार्यकारी परिषद् सदस्य नियुक्त गर्न सिफारिस गरेको थियो । योगी एमाले निकट शिक्षक हुन् । उपकुलपति अध्यक्ष रहने कार्यकारी परिषद‍्मा डीनमध्येबाट लिलाधर तिवारी सदस्य छन् । शिक्षकमध्येबाट योगी नियुक्त भएमा ४ सदस्यीय कार्यकारी परिषदमा ३ जना एमाले निकट हुने छन् । 

परिषदमा रजिस्ट्रार प्रा.डा. शोभाखर कडेलमात्र कांग्रेस निकट हुन् । विश्वविद्यालय ऐनअनुसार कार्यकारी परिषद् शक्तिशाली निकाय हो । यही निकायका उपकुलपतिले एकलौटी गर्न खोजेपछि सिफारिस नै विवादमा परेको हो । 

विश्वविद्यालयको प्रजातन्त्रवादी प्राध्यापक संघले उपकुलपति गौतमलाई ज्ञापनपत्र बुझाउँदै ७२ घण्टे अल्टिमेटम दिएको छ । संघले एकलौटी ढंगले कार्यकारी सदस्य नियुक्तिका लागि भएको सिफारिस बदर गर्न माग गरेको छ । सिफारिस ७२ घण्टाभित्र बदर नगरिएको खण्डमा आन्दोलनमा उत्रिने चेतावनी संघले दिएको छ ।

प्राध्यापक संघले लामो समयदेखि आंशिक र करारमा रहेका शिक्षकको हकहितका लागि आवाज उठाउँदै आएको छ ।