बेनी–अर्थुङ्गे सडक स्तरोन्नति शुरु

३ बर्ष अगाडि

कोरोना महामारी रोकथामका लागि गरिएको लकडाउनका कारण प्रभावित भएको बेनी–अर्थुङ्गे सडक स्तरोन्नति आयोजना शुरु भएको छ । 

आँपरुखदेखि अर्थुङ्गेको पुलाचौर जाने सडकको चोक जोड्ने सडकमा नाली बनाउने, ढलान गर्न र कालोपत्रे गर्न गत वर्ष ठेक्का सम्झौता भएको आयोजना कार्यान्वयनको क्रममा कोरोना जोखिम, बन्दाबन्दी, मजदूर र निर्माण सामग्रीको अभावका कारण प्रभावित भएको थियो । नगरपालिकाका प्रमुख प्रशासकीय अधिकृत छबिलाल सुवेदीले करिब २५ प्रतिशत भौतिक प्रगति भएको आयोजनालाई आगामी चैत महिनासम्म म्याद थपेर चालु आर्थिक वर्षमा निरन्तरता दिइएको बताउनुभयो । यो बेनी नगरपालिकाको सबैभन्दा ठूलो र महत्वपूर्ण आयोजना हो । 

रु एक करोड ३५ लाख लागत अनुमान गरिएको आयोजना खुसीहोम बिल्डर्सले रु ८८ लाखमा ठेक्का लिएको थियो । सम्झौताअनुसार २०० मिटर ढलान, ७०० मिटर कालोपत्रे गर्ने र ७०० मिटर नाली बनाउने लक्ष्य छ । देउरालीमा ढलान सकेको ठेकेदारले सेनाको श्रीबक्स गुल्मको ब्यारेकमुनिको सडक ढलानको तयारी गरेको इञ्जिनीयर विमलरञ्जन कार्कीले बताउनुभयो । 

बेनी नगरपालिकाको चार र रघुगङ्गा गाउँपालिकाको दुई वटा वडाका बासिन्दाले सदरमुकाम बेनी आवतजावत गर्न प्रयोग गर्ने यो सडक स्तरोन्नति गर्न बेनी नगरपालिकाले क्रमागत आयोजना सञ्चालन गरेको छ । आयोजनाको शुक्रबार अनुगमन गर्न पुग्नुभएका नगरप्रमुख हरिकुमार श्रेष्ठ लगायतको टोलीले निर्माण व्यवसायी मनोज कार्कीलाई थपिएको समयभित्र काम सम्पन्न गर्न र गुणस्तरीय निर्माण सामग्री प्रयोग गर्न निर्देशन दिनुभयो । 

आयोजना स्थलमा भेटिएको कमलस बालुवा प्रयोग नगर्न निर्देशन दिइएको थियो । यसअघि गत असारमा रिबाउण्ड ह्याम्बर उपकरणको प्रयोग गरेर नालीको ढलान परीक्षण गर्दा गुणस्तरअनुसारको नपाएपछि भत्काउन निर्देशन दिइएको थियो । सो नाली भत्काएर नयाँ बनाउन पुनःनिर्देशन दिइएको छ । 

यसैगरी अर्थुङ्गेमै निर्माण शुरु भएको वडा कार्यालय भवनलाई गति दिन ठेकेदार कम्पनीका प्रतिनिधि शिशिर शाहीलाई निर्देशन दिइएको छ । भवनको जग खन्ने मात्र काम भएको छ । बर्खामा पहिरो खसेपछि रोकिएको भवन निर्माणलाई तीव्रता दिने शाहीले प्रतिबद्धता जनाउनुभयो । वडा कार्यालय भवन निर्माणका लागि पनि चैतसम्म म्याद थप भएको छ ।

प्रारम्भिक वातावरण परीक्षण गरेर मात्र सडक निर्माण गरिने 

म्याग्दीको मङ्गला गाउँपालिकाले सडक निर्माण गर्नुअघि अनिवार्य प्रारम्भिक वातावरणीय परीक्षण ९आइई० गर्नुपर्ने बाध्यकारी व्यवस्था गरेको छ । 

विकास आयोजनालाई वातावरणमैत्री बनाएर विपद् न्यूनीकरण गर्न शुक्रबार बाबियाचौरमा भएको विशेष गाउँसभाले ‘स्थानीय वातावरण तथा प्राकृतिक स्रोत संरक्षण ऐन’ पारित गरेको छ । जथाभावी डोजर चलाएर खनिने र विस्तार गरिने सडकका कारण प्राकृतिक विपत्तिका घटना बढ्न थालेपछि सडक खन्नु अघि अनिवार्यरुपमा वातावरणीय परिक्षण गर्नुपर्ने नीतिगत व्यवस्था गरेको हो । गाउँपालिकाका अध्यक्ष सतप्रसाद रोकाले सभामा प्रस्तुत गर्नुभएको विधेयक सर्वसम्मतरुपमा पारित भएको थियो । 

गत भदौमा जिल्ला प्रशासन कार्यालयले बेनीमा आयोजना गरेको सर्वपक्षीय बैठकले प्रारम्भिक वातावरणीय प्रभाव अध्ययन गरेर मात्र सडक खन्ने निर्णय गरेको थियो । सर्वपक्षीय बैठकको निर्णय र गाउँपालिकाको वातावरणमैत्री विकासलाई अघि बढाउने नीति कार्यान्वयनको लागि ऐन बनाइएको प्रमुख प्रशासकीय अधिकृत मनोहर ढुङ्गानाले बताउनुभयो । 

ऐनमा सडकको नयाँ ट्रयाक निर्माणमा प्रारम्भिक वातावरणीय प्रभाव परीक्षण गर्ने, फोहोरमैला व्यवस्थापन, नदीजन्य ढुङ्गागिट्टी लगायतका वातावरणीय स्रोत व्यवस्थापनका क्षेत्रलाई समेत समेटीएको छ । सभामा गाउँपालिकाले पहिलो चौमासिकमा तीन दशमलव २१ प्रतिशत पूँजीगत र २० दशमलव १९ प्रतिशत चालु प्रगति भएको विवरण प्रस्तुत गरिएको थियो । सभाले कार्यपालिका बैठकबाट भएका निर्णय अनुमोदन तथा योजना कार्यान्वयनको लागि आवश्यक अधिकार प्रत्यायोजन गरेको उपाध्यक्ष सिर्जना केसीले बताउनुभयो । 

सभाले वडा नम्बर ५ पुलचोक–पिपलबोट–पाँखु–धारा– सिर्कुम– टीकाबाङ सडकखण्डको हाँडेभिरमा सडकको ट्रयाक निर्माण र नदी नियन्त्रण योजना सञ्चालनको लागि थप रु ५० लाख बजेटको स्रोत व्यवस्थापन गरेको गाउँपालिकाका सूचना अधिकारी राजेन्द्र आचार्यले जानकारी दिनुभयो ।

उहाँका अनुसार, यसअघि रु ५० लाख बजेट विनियोजन भएको सो योजनामा सभाले ५० लाख थप गरी रु एक करोड बजेटको योजना ठेक्कामार्फत कार्यान्वयन गर्ने स्रोत व्यवस्थापन गरेको हो । सङ्घीय सांसद भूपेन्द्रबहादुर थापाको सिफारिसमा स्थानीय पूर्वाधार साझेदारी कार्यक्रमको रु २४ लाख र गाउँपालिकाको सम्पूरक कोषबाट २६ लाख बजेटलाई समेटेर थप ५० लाख बजेट सो योजनामा थप गरिएको हो । 
 

३ बर्ष अगाडि

प्रतिक्रिया