एजेन्सी - फ्रान्सेली क्लब पेरिस सेन्ट जर्मेन (पिएसजी) ले युईएफए च्याम्पियन्स लिग अन्तर्गत समूहको अन्तिम खेलमा क्लब ब्रुगमाथि ४-१ को फराकिलो जित निकालेको छ । लिओनेल मेसी र केलीयन एम्बाप्पेले २-२ गोल गरेपछि  पिएसजीले सानदार जित निकालेको हो । 

खेलको दोस्रो मिनेटमै एम्बाप्पेको गोल गर्दै घरेलु टोलीलाई सुरुआती अग्रता दिलाए । त्यसको ५ मिनेटमै एम्बाप्पेले व्यक्तिगत दोस्रो गोल गर्दा पाहुना टोली पहिलो १० मिनेटमै २-० ले पछि पर्‍यो । 

खेलको ३७ औं मिनेटमा लिओनेल मेसीले गोल गर्दै पिएसजीको अग्रता पहिलो हाफमै तेब्बर पुर्‍याए । पिएसजीमाथि ३९ प्रतिशत बल पोजिसन राखेको क्लब ब्रुगका लागि माट्स रिट्सले ६७ ‍औं मिनेटमा गोल गर्दै खेलमा फर्कने संकेत देखाए । 

खेलको ७६ औं मिनेटमा मेसीले गोल गर्दै खेलमा ४-१ को स्पष्ट अग्रता बनाए । मेसीलाई पेनाल्टी क्षेत्रभित्र लडाएपछि दिइएको पेनाल्टीलाई उनी आफैँले गोलमा परिणत गरेका थिए । 

यो जितसँगै पिएसजी दोस्रो स्थानमा रहँदै अन्तिम १६ मा प्रवेश गरेको छ । पिएसजीले ६ खेलमा ३ जित, २ बराबरी र १ हारसहित ११ अङ्क जोड्दै दोस्रो रह्यो ।