काठमाडौं - रामबाबु गुरुङले निर्देशन गरेको फिल्म ‘कबड्डी-४’ ले अहिले स्वदेश र विदेशमा आक्रामक कमाइ गरिरहेको छ । उक्त फिल्मको तुलना अर्को ब्लकबस्टर फिल्म ‘छक्कापञ्जा’सँग भइरहेको छ ।

‘छक्कापञ्जा’को नयाँ सिक्वेल निर्माणको चर्चाबीच निर्माता एवं अभिनेता दीपकराज गिरीले अघिल्ला सिक्वेलको कमाइ सार्वजनिक गरेका छन् । उनका अनुसार ‘छक्कापञ्जा १’को कमाइ १६ करोड रहेको छ । तर छक्कापञ्जाको तेस्रो सिक्वेलको कमाइ २० करोड रुपैयाँ रहेको उनले बताए ।

‘सबैले कबड्डी ४ ले छक्कापञ्जा ३ को रेकर्ड उछिनेको बताएका छन् । तर त्यसो होइन, छक्कापञ्जा १ को रेकर्ड मात्र तोडिएको हो । ३ को कमाइ त २० करोड हो,’ उनले भने ।

बक्स अफिसको अंकगणितलाई लिएर दीपकले यस्तो बताएका हुन् । कबड्डी-४ का वितरकले ११ दिनमा फिल्मले १७ करोड ६५ लाख ग्रस कमाइ गरेको बताइरहँदा छक्कापञ्जा निर्माता गिरीको यस्तो भनाइ आएको हो ।

पहिलो सातामा १५ करोडमाथि व्यापार गरेको कबड्डी ४’ ले आइतबारसम्म १७ करोड ६५ लाख ग्रस कमाएको जानकारी वितरक गोविन्द शाहीले दिए ।

फिल्मले अझै राम्रो व्यापार गरिरहेको वितरक शाहीले जानकारी दिए ।