काठमाडौं - हिमालयन हाइड्रोपावर लिमिटेडको आईपीओ निष्कासनको अन्तिम दिन असार १९ गतेसम्म झन्डै १० गुणाले ओभरसब्सक्राइब्ड भएको छ । 

यो कम्पनीले गत असार १५ गतेदेखि सर्वसाधारणका लागि आईपीओ बिक्री खुला गरेको थियो । यसमा आज बैंकिङ समयसम्म आवेदन दिन पाउने व्यवस्था गरिएको थियो । 

कम्पनीले १०० अंकित दरका कुल १९ लाख ६८ हजार २५० कित्ता आईपीओ जारी गरेको थियो । जसमा पहिलो चरणमा ९ लाख कित्ता आयोजना प्रभावित क्षेत्रका बासिन्दाहरुका लागि निष्कासन गरेकोमा २ लाख ८१ हजार ७५० कित्तामात्र बाँडफाँट भएकोले बाँकी ६ लाख १८ हजार २५० कित्ता पनि जोडिएको थियो । 

कुल कित्तामध्ये ३९ हजार ३६५ कित्ता (२ प्रतिशत) कर्मचारीका लागि सुरक्षित गरिएको छ भने ९८ हजार ४१३ कित्ता (५ प्रतिशत) सामूहिक लगानी कोषमा बाँडफाँड गरिएको छ । बाँकी १८ लाख ३० हजार ४७२ कित्तामा सर्वसाधारणले आवेदन दिन पाउने व्यवस्था गरिएको थियो । 

धितोपत्र बिक्री प्रबन्धक ग्लोबल आइएमई क्यापिटलका अनुसार आइतबार साँझसम्म यो आईपीओमा १६ लाख ३ हजार ९७५ आवेदकबाट कुल १ करोड ७९ लाख ७ हजार १९४० कित्ता सेयर माग भएको छ । जुन मागभन्दा ९.७८ गुणा बढी हो ।

मागभन्दा बढी आवेदन परेका कारण यो आईपीओ पनि अब गोलाप्रथाबाट बाँडफाँड हुनेछ । जसअनुसार १ लाख ८३ हजार ४७ जनाले १० कित्ताका दरले सेयर पाउनेछन्।  तिनैमध्ये भाग्यमानी २ जनाले थप १–१ कित्ता सेयर पाउनेछन् ।